काठमाडौँ : दक्षिण एशियामा क्यान्सरका कूल विरामीमध्ये २० प्रतिशतमा मुखको क्यान्सर हुने गरेको पाइएको छ।
कान्तिपुर डेन्टल कलेज र नेशनल इन्टिच्युट अफ क्रेनियोफेसियल सर्जरीले आज यहाँ आयोजना गरेको मुखको क्यान्सरसम्बन्धी अन्तरराष्ट्रिय गोष्ठीमा दक्षिण एशियामा कुल क्यान्सरका विरामीमध्ये २० प्रतिशतमा मुखको क्यान्सर पाइएको बताइएको हो।
कार्यक्रममा नेशनल इन्टिच्यूट अफ क्रेनियोफेसियल सर्जरीका कार्यकारी निर्देशक एवम् क्रेनियोफेसियल सर्जन डा सुमित सिंहले सूर्तीजन्य पदार्थको जथाभावी प्रयोगले मुखको क्यान्सरका विरामी बढेको बताए।
“चुरोट, बिँडी, हुक्का, तमाखु, गुड्खा, पानलगायतका सूर्तीजन्य पदार्थसेवनका कारण मुखको क्यान्सरका विरामी बढ्दै गएका छन्। नेपालमा हिमाल र पहाडको तुलनामा तराईमा मुखको क्यान्सरका विरामीको संख्या धेरै रहेको पाइएको छ”, उनले भने।
त्यसैगरी वार्षिक २ प्रतिशत विरामीको मुखको क्यान्सरका कारण मृत्यु हुने गरेको पाइएको जानकारीसमेत उनले दिए।
कार्यक्रममा नेपाल मेडिकल काउन्सिलका रजिष्ट्रार डा सतीश देवले काउन्सिलले क्यान्सरपीडित विरामीको सुरक्षालाई उच्च प्राथमिकतामा राखेर काम गरिरहेको र त्यस कार्यमा यस्ता अन्तरराष्ट्रिय गोष्ठीमा व्यक्त तथ्य र तथ्याङ्कले थप रणनीति बनाएर काम गर्न सहयोग पुग्ने विश्वास व्यक्त गरे।
कान्तिपुर डेन्टल कलेज शिक्षण अस्पतालका कार्यकारी निर्देशक डा बुद्धिमान श्रेष्ठले देशभरका दन्त चिकित्सकलाई मुखको क्यान्सरसम्बन्धी तालिम दिन जरूरी रहेको उल्लेख गरे।
पछिल्लो समय बढ्दै गएको मुखको क्यान्सरसम्बन्धी समस्याबारे जानकारी दिन कान्तिपुर डेन्टल कलेजले विभिन्न निकायसँगको सहकार्यमा काम गरिरहेको बताए।
एकदिने अन्तरराष्ट्रिय गोष्ठीमा नेपाल, भारत र बङ्गलादेशका एक सयभन्दा बढी डाक्टरको सहभागिता थियो।
मुखको क्यान्सर पत्ता लगाउन हाल नेपालमा वायोप्सी प्रविधिको प्रयोग हुँदै आएको छ। आगामी दिनमा लेजर प्रविधि र भेलोस्कोप प्रविधिसमेत प्रयोगमा ल्याउने विषयमा पनि छलफल भएको थियो।
तपाईंको ईमेल गोप्य राखिनेछ ।