काभ्रेपलाञ्चोक : अर्थमन्त्री डा युवराज खतिवडाले पाँचखालमा निर्माणाधीन विशेष आर्थिक क्षेत्र (सेज) बनेपाको आइटी पार्क जस्तो प्रयोगविहीन नबनाउन आग्रह गरे।
अर्थमन्त्री खतिवडाले शनिबार पाँचखाल नगरपालिका ८ मा निर्माणाधीन सेजको निरीक्षणका क्रममा स्थानीय जनप्रतिनिधिसँग निर्माण तथा प्रयोगमा तदारुकताका साथ लाग्न आग्रह गरे।
'बजेटको कमी हुँदैन। बजेट अभावले काम रोकिँदैन। हामीले उद्योग मन्त्रालयसँग यसबारे समन्वय गरिरहेका छौँ', उनले भने। उनले भौतिक संरचना निर्माण भइसकेपछि कतिपयमा सरकारको ध्यान नजाने भएकाले आफूहरूलाई झकझकाउन आग्रह गरे।
मन्त्री खतिवडाले बनेपामा निर्माण भएको आइटी पार्क बिजोक अवस्थामा रहेकामा दुःखेसो पोखे। उनले भने, 'बनेपाको आइटी पार्क बिजोक अवस्थामा छ। अर्बौं लगानी गरियो। अहिले प्रयोगविहीन अवस्थामा छ। यो निकै दुःखलाग्दो विषय हो।'
दुई सय ५७ रोपनीमा फैलिएको आइटी पार्कमा दुई ठूला प्रशासनिक भवन, चार सुविधासम्पन्न आवासीय भवन तथा अन्य आवश्यकीय गरी नौ भवन प्रयोगविहीन अवस्थामा छन्।
मन्त्री खतिवडाले धुलिखेलदेखि चीनतर्फको सडक विस्तार गर्ने तयारी भइरहेको उल्लेख गर्दै सडक विस्तारपछि पाँचखालको भविष्य उच्च रहेको बताए। 'सेजभित्र व्यवसाय गर्न सुरक्षित वातावरण आवश्यक पर्ने भएकाले विशेष गरी स्थानीय जनप्रतिनिधिले सुरक्षामा ध्यान दिनुपर्दछ', उनले भने। स्थानीय उद्योगी व्यवसायीसँग छलफल गरी सेज सञ्चालन गरिने उनले बताए।
मन्त्री खतिवडाले सरकार एक्लैले सेज सञ्चालन गर्न नसक्ने भएकाले स्थानीय सरोकारवालाले व्यवसायी खोज्नुपर्ने बताए। उनले भने, 'राजमार्गदेखि सेजसम्म जाने सडक सरकारले बनाई दिनसक्छ। यसका लागि प्रदेश सरकारसँग समन्वय गर्नेछौँ।' उक्त अवसरमा उनले निर्माण कम्पनीलाई समयसीमाभित्र सम्झौता अनुसारको भवन बनाउन निर्देशनसमेत दिए।
चालू आवमा १२ करोडमा सेज आयोजनाको मुख्य भवन तथा रु तीन करोडमा पर्खाल निर्माण भइरहेको छ। सेज निर्माणका लागि नगरपालिकाको वडा नं ७ र ८ स्थित पाँँडुला देवीस्थान सामुदायिक वन र शिखरपुर सामुदायिक वन गरी करिब एक हजार रोपनी जग्गामा सेजका संरचना निर्माण थालिएको ८ नंका वडाध्यक्ष पुष्कर ढकालले जानकारी गराए।
तपाईंको ईमेल गोप्य राखिनेछ ।