काठमाडौँ : १२२औँ सम जयन्तीको अवसर पारेर नेपाल सङ्गीत तथा नाट्य प्रज्ञा प्रतिष्ठानको आयोजना, नेपाल ललितकला प्रज्ञा प्रतिष्ठान र नेपाल प्रज्ञा प्रतिष्ठानको सहकार्यमा ‘सम्झनामा बालकृष्ण सम’ शीर्षकमा विचार गोष्ठी तथा अन्तरक्रिया, कविता वाचन, चित्रकला र वृत्तचित्र प्रदर्शनी कार्यक्रम गरिएको छ।
ललित कला प्रज्ञा प्रतिष्ठानमा नेपाल सङ्गीत तथा नाट्य प्रज्ञा प्रतिष्ठानका कुलपति निशा शर्माको अध्यक्षतामा आयोजित कार्यक्रममा तीन वटै प्रज्ञा प्रतिष्ठानका कुलपतिले संयुक्त रूपमा बालकृष्ण समको तस्वीरमा माल्यार्पण गरे।
कार्यक्रममा कुलपति निशा शर्माले कार्यक्रममा प्रदर्शन गरिएको वृत्तचित्रले बालकृष्ण सम रङ्गमञ्च र साहित्यबाहेक चित्रकलाका पनि महान् कलाकार हुन् भन्ने स्पष्ट पारेको बताइन्।
उनका कृतिहरू प्रह्लाद, भीमसेनको अन्त्य, स्वास्नी मान्छे, चिसो चुह्लोलगायत कृतिमाथि कलाकारहरूले बनाउने चित्र हेर्न उत्सुक रहेको कुलपति शर्माले बताइन्।
नेपाल प्रज्ञा प्रतिष्ठानका कुलपति भूपाल राईले बालकृष्ण सम साहित्य र चित्रकलाका विधामा अब्बल स्रष्टा भएता पनि उनलाई नाटककारका रूपमा बढी चर्चा गरिनुपर्ने बताए।
उनले तीन वटै प्रज्ञा प्रतिष्ठानको सहकार्यबाट यस कार्यक्रमको आयोजना हुनुले तीन वटै प्राज्ञिक संस्था एकै ठाउँमा छन् भन्ने सन्देश दिएको बताउँदै अब यी प्राज्ञिक संस्थाको परम्परागत कार्यशैलीलाई फरक र नयाँ शैलीबाट चलायमान बनाउनुपर्नेमा जोड दिए।
कार्यक्रममा ललितकला प्रज्ञा प्रतिष्ठानका कुलपति नारदमणि हार्तम्छालीले समको योगदानको चर्चा गर्दै सेक्सपियरको नाट्यशैलीलाई बालकृष्ण समले नेपालीकरण गरेर नेपाली नाट्य क्षेत्रमा महत्त्वपूर्ण योगदान दिएको बताउँदै समलाई समग्र कला र साहित्य क्षेत्रका अभिभावकको रूपमा चित्रण गरे।
कार्यक्रममा डा. अशोक थापाले बालकृष्ण समले नाटकमा पुर्याएको योगदान र नाटकमा प्रयोग भएका बहुआयामिक पक्षलाई समेटेर ‘समको गुणात्मक नाट्य योगदान’ विषयक कार्यपत्र प्रस्तुत गरेका थिए। कार्यपत्रमाथि विष्णु ज्ञवालीले टिप्पणी गरेका थिए।
कार्यक्रममा प्राज्ञ बाबा बस्नेत, राधा कार्की, विष्णु ज्ञवाली, सन्ध्या पहाडीलगायतले कविता वाचन गरेका थिए भने रमेश खनालको लेखन तथा निर्देशन रहेको बालकृष्ण समको चित्रकारितामा आधारित वृत्तचित्रसमेत प्रदर्शन गरिएको थियो।
कार्यक्रममा बालकृष्ण समको प्रह्लाद, भीमसेनको अन्त्य, स्वास्नी मान्छे, चिसो चुह्लो जस्ता कृतिमा आधारित चित्रकला निर्माण गर्न क्यानभास उपलब्ध गराइएको थियो।
कार्यक्रममा प्रज्ञा प्रतिष्ठानहरूका पदाधिकारी, नाट्यकर्मी, कलाकर्मी तथा साहित्यकारहरूको उपस्थिति थियो।
तपाईंको ईमेल गोप्य राखिनेछ ।