सन् २०२३ मा विश्वभरमा आप्रवासन मार्गमा कम्तीमा आठ हजार ५६५ व्यक्तिको मृत्यु भएको छ। संयुक्त राष्ट्रसंघको अन्तर्राष्ट्रिय आप्रवासन संगठन (आईओएम) ले दशककै सबैभन्दा घातक वर्ष भएको बताएको हो।
‘सन् २०२३ मा मृत्यु हुनेको संख्या सन् २०२२ को तुलनामा २० प्रतिशतको दुःखद वृद्धिलाई देखाउँछ, यसले जीवनको थप क्षतिलाई रोक्नका लागि तत्काल कदम चाल्नुपर्ने आवश्यकतालाई उजागर गर्दछ’, आईओएमको विज्ञप्तिमा उललेख छ।
आईओएमका अनुसार गत वर्षको संख्याले सन् २०१६ को पछिल्लो रेकर्डलाई तोडेको छ। सन् २०१६ मा आप्रवासनका क्रममा आठ हजार ८४ जनाको मृत्यु भएको थियो। आइओएमका अनुसार सुरक्षित तथा नियमित बसाइँसराइ मार्ग सीमित भएकाले प्रत्येक वर्ष हजारौँ मानिस असुरक्षित परिस्थितिमा अनियमति मार्गबाट बसाइँसराइको प्रयास गर्छन्।
भूमध्य सागर आप्रवासीहरूका लागि सबैभन्दा घातक मार्ग भएको छ। गत वर्ष कम्तीमा तीन हजार एक सय २९ जनाको मृत्यु र बेपत्ता रेकर्ड गरिएको छ। सन् २०२३ मा कूल आप्रवासीको मृत्युमा आधाभन्दा धेरै मृत्यु डुबेर भएको छ। ९ प्रतिशत वाहन दुर्घटना र ७ प्रतिशत हिंसाका कारण भएको छ।
आईओएमको मिसिङ माइग्रेन्ट्स प्रोजेक्ट सन् २०१४ मा आप्रवासीको मृत्यु र बेपत्ताका बारेमा एउटा ओपन-एक्सेस डेटाबेसका रूपमा स्थापना गरिएको थियो। त्यसबेलादेखि विश्वभरमा ६३ हजार मामिलालाई दस्तावेजीकरण गरिएको छ। यद्यपि विशेषरूपमा दुर्गम स्थानमा डेटा सङ्ग्रहमा चुनौतीका कारण वास्तविक आँकडा अत्यन्त धेरै अनुमान गरिएको छ।
‘मिसिङ माइग्रेन्ट्स प्रोजेक्टको १० वर्ष पूरा गर्दैगर्दा हामी सबैभन्दा पहिला ती सबै ज्यान गुमाएकालाई स्मरण गर्दछौँ’, आईओएमका उपमहानिर्देशक उगोजी डेनियलले भनेका छन्, ‘तिनीहरूमध्ये प्रत्येक एउटा भयानाक मानवीय त्रासदी हो जुन आगामी वर्षहरूमा परिवार र समुदायमा प्रतिध्वनित भइरहनेछ।
–––
तपाईंको ईमेल गोप्य राखिनेछ ।