काठमाडौँ : विश्व हिन्दु महासङ्घले वेदान्तका प्रखरवक्ता एवं प्राध्यापक शिवगोपाल रिसाललाई विसं २०८० को पाणिनी पुरस्कार प्रदान गरेको छ।
महासङ्घको ४४औँ स्थापना दिवसका अवसरमा आज आयोजित कार्यक्रममा राष्ट्रिय प्रजातन्त्र पार्टीका पूर्वअध्यक्ष तथा सांसद पशुपति शम्शेर जबराले रिसाललाई २५ हजार रुपैयाँ राशीको पुरस्कार र सम्मानपत्र प्रदान गरे।
त्यसअवसरमा ५० हजार रुपैयाँ राशीको ‘भरतकेशर सिंह विश्व हिन्दु अन्तरराष्ट्रिय’ पुरस्कार महन्थ सुरेन्द्रनाथ अवधूतलाई प्रदान गरियो। कार्यक्रममा नीना भेटुवाल, सोभित उप्रेती र लक्ष्मण सापकोटालाई ‘विश्व हिन्दु सेवा रत्न’ सम्मान प्रदान गरियो।
मुलुकको कला, धर्म, संस्कृति, भाषा, संस्कार, वेशभूषा तथा सनातन वैदिक उन्नयनमा विशिष्ट योगदान पुर्याउने प्राडा माधवप्रसाद भट्टराई, वरिष्ठ अधिवक्ता शेरबहादुर केसीलगायत ११ जनालाई पनि समारोहमा सम्मान गरियो।
रामनवमीका अवसरमा आयोजित उक्त कार्यक्रममा जैन, शिख, बौद्ध धर्मगुरुले स्वस्ति वाचन गर्नुका साथै मर्यादा पुरुषोत्तम भगवान रामचन्द्रको तस्वीरमा माल्यार्पण गरे।
विसं २०३० मा स्थापित महासङ्घले विश्वभर रहेका वैदिक सनातन धर्मावलम्बीलाई एकाकार गरी विश्वशान्ति र सहअस्थित्व कायम गर्ने साझा संस्थाका रुपमा काम गर्दै आएको कार्यवाहक अध्यक्ष अस्मिता भण्डारीले जानकारी दिइन्।
त्यसअवसरमा महासङ्घद्वारा प्रकाशित ‘धम’ नामक स्मारिकको विमोचनसमेत गरियो।
तपाईंको ईमेल गोप्य राखिनेछ ।