काठमाडौँ : चौथो राष्ट्रिय फ्रेण्डसिप खुला तेक्वान्दो प्रतियोगिता आगामी वैशाख २ गते काठमाडौँमा आयोजना हुने भएको छ।
मंगलवार काठमाडौँमा पत्रकार सम्मेलनमार्फत आयोजक कोटेश्वर तेक्वान्दो डोजाङ र नेप्लिज तेक्वान्दो एकेडेमी (एनटिए) ले एकदिने प्रतियोगिताबारे जानकारी दिएको हो।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा हुने प्रतियोगितामा देशभरबाट ६ सयभन्दा बढी खेलाडीले प्रतिस्पर्धा गर्दै छन्।
यद्यपि उक्त प्रतियोगिता खेले खेलाडीमाथि कारबाही हुने नेपाल तेक्वान्दो संघले विभागीय टोली र जिल्ला संघमार्फत पत्रकार गरेको छ।
प्रत्येक दुई वर्षमा आयोजना हुँदै आएको प्रतियोगितामा खेलाडीलाई वञ्चित गर्नु निरंकुशताको पराकाष्ठा रहेको नेपाली राष्ट्रिय तेक्वान्दो टोलीका प्रमुख प्रशिक्षक नवीनकुमार श्रेष्ठले आरोप लगाए।
सरकारले नै आफूलाई तेक्वान्दो खेल विकासका लागि जागिर दिएको उल्लेख गर्दै प्रमुख प्रशिक्षक श्रेष्ठले व्यक्तिगत स्वार्थमा रहेर खेलाडीमाथि राजनीति गर्नु खेल विकासलाई अवरोध पुर्याउनु रहेको उल्लेख गरे।
आयोजकले चौथो संस्करणको आयोजना मिति नजिकिँदै गर्दा सम्पूर्ण तयारी पनि पूरा भइसकेको जनाएको छ। प्रतियोगितामा क्योरोगीको सिनियर पुरुष/महिलामा समान ६/६ गरी कुल १२ स्पर्धामा खेल हुनेछ। तेक्वान्दोकै अन्ताराष्ट्रिय रेफ्री अशोक खड्काले नेपाली खेलकुदको कार्यकारी निकाय राखेपले नै आयोजना गरेको इतिहास बोकेको राष्ट्रिय खेलकुदमा समेत प्रतिस्पर्धा गर्न नेपाल तेक्वान्दो संघले खेलाडीलाई रोक्ने गरेको पीडा व्यक्त गरे।
नेपाल तेक्वान्दो संघले पटकपटक खेलाडीलाई खेल्न वञ्चित गराउँदै आएको खड्काले आरोप लगाए।
प्रतियोगितामा क्योरोगीकै जुनियर पुरुष/महिलामा समान १०/१० गरी २० स्पर्धामा भिडन्त हुनेछ। पुम्सेको व्यक्तिगत, समूहगत र पेयरमा १२ स्पर्धामा खेलाडीले कौशल प्रदर्शन गर्नेछन्। यी सबै गरेर क्योरोगी र पुम्सेमा गरी कुल ४४ स्वर्ण पदकका लागि प्रतिस्पर्धा हुँदै छ। यो प्रतियोगिता आगामी अगस्ट २३ देखि २४ सम्म दक्षिण कोरियाको सोलमा हुने अन्ताराष्ट्रिय ओपन फ्रेण्डसिप तेक्वान्दो च्याम्पियनसिप (आइओएफटिसी) को खेलाडी छनोटको आधारसमेत हो।
यहाँबाट समान तीन पुरुष र महिला गरी कुल ६ खेलाडी सोलमा हुने प्रतियोगितामा छनोट हुनेछन्। व्यक्तिगत पुम्सेबाट समान एक पुरुष/महिला तथा सिनियर स्पर्धाबाट समान २/२ पुरुष र महिला गरी चार खेलाडी छनोट हुनेछन्। सिनियर तौलसमूहका स्वर्ण विजेतालाई ओलम्पिक तौलसमूहमा विभाजन गरी पुनः प्रतिस्पर्धा गराइनेछ। यहाँबाट समान २/२ पुरुष र महिला स्वर्ण विजेताले दक्षिण कोरियामा हुने प्रतियोगितामा प्रतिस्पर्धा गर्न पाउनेछन्।
शीर्ष तीन स्थानमा रहने टोलीले क्रमशः एक लाख, ५० हजार र २५ हजार रुपैयाँ पुरस्कार पाउनेछन्। उत्कृष्ट प्रशिक्षक र निर्णायक पनि जनही १० हजार नगदबाट पुरस्कृत हुने आयोजकले जनाएको छ।
प्रकाश शमसेर राणा नेतृत्वको नेपाल तेक्वान्दो संघले यो प्रतियोगिता खेले कारबाही गर्ने भन्दै तीन विभागीय टोली त्रिभुवन आर्मी क्लब, एपिएफ र नेपाल पुलिस क्लबका साथै जिल्ला संघलाई पत्र पठाएकाले खेलाडीले ठूलो अवसर गुमाउने भएका छन्।
तपाईंको ईमेल गोप्य राखिनेछ ।