बैतडी : नेपाल–भारत जोड्ने दार्चुलाको नाका नियमित रुपमा खोल्न नेपाल सरकारलाई अनुरोध गर्ने निर्णय भएको छ।
जिल्ला प्रशासन कार्यालयमा आज बसेको सर्वपक्षीय बैठकले सदरमुकाम खलंगास्थित घाट बजारमा रहेको नेपाल–भारत जोड्ने झोलुंगे पुल नियमित रुपमा खोल्न गृह मन्त्रालयमार्फत नेपाल सरकारलाई अनुरोध गर्ने निर्णय भएको हो।
सर्वपक्षीय बैठकले सिमाका नागरिकको जनजीविकासँग जोडिएको सीमा पुल नियमित रुपमा खोल्न सरकारलाई लेखि पठाउने निर्णय गरिएको जिल्ला समन्वय समिति दार्चुलाका समन्वय अधिकारी मोहन सिंह धामीले जानकारी दिए।
विश्वव्यापी कोरोना भाइरस महामारीका कारण बन्द अवस्थामा रहेको झोलुंगे पुल नियमित रुपमा नखुल्दा यस भेगको आर्थिक, सामाजिक जीवनमा प्रभाव परेको भन्दै सिमा पुल नियमित रुपमा खोल्न नेपाल सरकारलाई अनुरोध गने निर्णय गरिएको हो।
समन्वय समितिका प्रमुख करवीर बहादुर कार्कीको अध्यक्षतामा बसेको बैठकमा महाकाली नगरपालिकाका नगर प्रमुख हंसराज भट्ट, प्रमुख जिल्ला अधिकारी शरद कुमार पोखरेल, नेपाली कांग्रेस जिल्ला कार्यसमिति सभापति ललित सिंह बोहरा, नेकपाका जिल्ला अध्यक्ष गणेश खत्री, दार्चुला उद्योग वाणिज्य संघका अध्यक्ष मंगल सिंह ठगुन्ना, सुरक्षा निकायका प्रमुख लगायत पत्रकारहरुको उपस्थिति रहेको थियो।
यसैबीच आजै बसेको कोरोना भाइरस संकट व्यवस्थापन केन्द्रको बैठकले हालै संयुक्त अधिराज्य, मध्य एसिया, पश्चिम एसिया तथा अफ्रिकामा कोरोनाको नयाँ प्रकार देखा परेको सन्दर्भमा स्वास्थ्य सुरक्षाको पालना गर्ने र रोकथामका लागी आवश्यक परे नेपाली सेना परिचालन गर्ने निर्णय गरेको छ।
तपाईंको ईमेल गोप्य राखिनेछ ।