दोलखा : गौरीशंकरदेखि नुम्बुर हुँदै सगरमाथासम्मको दृश्यावलोकन गर्न चाहनुहुन्छ भने चेर्दुङ उपयुक्त ठाउँ हो। दोलखा जिल्लाको जिरीको शिर भएर उभिएको सुन्दर डाँडा हो, चेर्दुङ।
समुद्र सतहदेखि करिब ३७०० मिटरको उचाइमा रहेको यो डाँडा प्राकृतिक रूपमा मनोरम त हो नै, हिन्दू र बौद्ध धर्मावलम्बीको साझा तीर्थस्थल पनि हो।
चेर्दुङ डाँडैबाट सगरमाथाको चुचुरो देखिनुका साथै गौरीशंकर र नुम्बुर हिमाल आँखै अगाडि ठोकिन आउँछन्। रामदुङ, छेकिगो, टासीलाप्सा र आमाबामरेजस्ता दर्जनौँ हिमशृंखलाको मनोरम दृश्य देख्न सकिन्छ।
दोलखाका साथै रामेछाप, सिन्धुपाल्चोक, काभ्रेपलाञ्चोक, काठमाडौं, सिन्धुली, ओखलढुंगा, सोलुखुम्बुु लगायतका दृश्य पनि हेर्न सकिन्छ। सबेरै सूर्योदय र अपराह्न सूर्यस्तको दृश्य हेरेर आनन्द लिन सकिन्छ।
साथै बाटोमा पर्ने क्याङ्से पोखरी र चौरीगोठले पनि यात्राको क्रममा आनन्द दिन्छन्। सुन्दर हरियाली पाखापखेरासँगै चराचुरूङ्गीका भाका पनि सुन्न पाइन्छ। बाटोमा पर्ने गोठमा बनिरहेका छुर्पी चाख्न पनि पाइन्छ।
कसरी पुग्ने ?
जिरी नगरपालिकाको धेरै ठाउँबाट चेर्दुङ पदयात्रा गर्न सकिन्छ। जिरीबजारमा शुरु भएर गोकुलगंगा पार्क–रमिते डाँडा–पटासे डाडा–क्याङ्से पोखरी हुँदै चेर्दुङ पुग्न ६-७ घण्टाको यात्रा गर्नुपर्छ।
अर्को मार्ग जिरी बजार-रातमाटे-कुथामे-जोरमाने-क्याङ्से पोखरीसम्म अनि त्यहाँबाट ३ घण्टा पैदल यात्रा पछि चेर्दुङ डाँडा पुग्न सकिन्छ। मोटरमा जाने हो भने १ देखि बढीमा दुई घण्टामा चेर्दुङ पुगिन्छ।
मनिष अर्याल/नेपाल फोटो लाइब्रेरी
तपाईंको ईमेल गोप्य राखिनेछ ।